Námskeið fyrir konur sem glímt hafa við vímuefnavanda
Hjá Vegvísi ráðgjöf er boðið upp á námskeið fyrir konur sem glímt hafa við vímuefnavanda og afleiðingar áfalla og ofbeldis.
Fyrirmynd námskeiðanna kallast á ensku Helping women recover og kemur frá Stephanie S. Covington félagsráðgjafa sem er frumkvöðull í vinnu með fíkn og áföll hjá konum. Í samræmi við það er lögð áhersla á að fíknivandi sé afleiðing af áfalli (ens. trauma) og/eða öðrum fjölþættum vanda í lífi kvenna og að neyslan sé því einkenni en ekki frumorsök.
Lögð er áhersla á fjóra þætti á námskeiðinu
- Sjálfsmynd, sambönd og samskipti kvenna
- Hvað er áfall og hverjar eru afleiðingar áfalla
- Hvað er ofbeldi og hverjar eru afleiðingar af ofbeldi
- Framtíðarsýn
Innan þessara þátta eru undirflokkar þar sem farið er ítarlega í þau atriði sem talin eru mikilvæg fyrir konur í uppbyggingarferli. Leiðbeinandinn fylgir ákveðnu handriti sem hann hefur fengið þjálfun í að fylgja.
Á námskeiðinu er unnið með styrkleika kvennanna og spurt hvað kom fyrir konurnar í stað þess að spyrja hvað sé að þeim. Hvernig þær hafi komist af og til hvaða bjargráða hver og ein þeirra hafi gripið. Kynntar eru nýjar aðferðir til að takast á við vandann í stað neyslu í hvaða mynd sem er.
Markmiðið með námskeiðinu er að konurnar öðlist aukna sjálfsvirðingu, aukið sjálfsmat og sjálfsþekkingu sem einstaklingar, í stað þess að skilgreina sig í gegnum sambönd eða stöðu sína. Konurnar finni styrkleika sína og geti byggt framtíð sína og betra líf á þeim.
Hópurinn hittist í 10 skipti einu sinni til tvisvar í viku eftir efnistökum, 90 mínútur í senn. Fjöldi í hverjum hóp eru 8-10 konur til að tryggja að hver og einn þátttakandi njóti námskeiðisins sem best. Hver þátttakandi fær afhend námskeiðsgögn í hverjum tíma. Starfið fer fram í húsnæði Vegvísis ráðgjöf í Hafnarfirði.